Von Öko- un Atomstrom

Emsdetten •

Wu wi fröher Strom spart häbt

Et is jä wissewull dankenswärt, dat Detten nu dän Ökoström vüöranbrengen will.

De Ümwiält häff et recht nairig.

Mänet müett't no iälke Saken kläört wärn un iälke Fraogen`ne Antwort finnen. Villicht meint nu Lüde, dat bloß Ökostrom ut de Steckdose kümp. Et is doch so, dat wi ümmer eenen egäöliken Mischstrom kriegt.

Wenn Lüde friewillig lück düeren Strom niemt, well segg dann, wat met dat üöwerschiärige Geld makt wett?

Un de nieen Namen müett't auk no richtig beliektekt wäarn. Dat Etikett „Ems-Natur Komfort" un „Ems-Natur Individual" lütt jä wahne guett un vüörneihm. Män, wat häff dat met usse fiene Iems to dohn? Villicht, dat in de Ims auk Water is?

De niee Strom ut Norwegen is jä Water-Kraft- Strom.

Wi müett't sieker alle vön Nies wier lärn - off et nu Öko- off Atomstrom is - met dat Elektrischke sühnig ümtogaohn! Ick mein de Tied, wao man no nich an „Dimmer" un „Bewegungsmelder" un „stand-by" un so'n Wiärks dacht häff. Dao hädde et eenfach un stracks: Lampen wärt bloß anmakt, wenn et harre nairig was. Un dat Üterste, wat in de eenzige Lampe, de in Huse was, was eene Birne von füfteihn Watt - un mähr nich!

Et hädde „Strom sparen!" off auk „Lampenfett" sparen un no froher: „Luchtenfett sparen!"

Eene Lampe briänen laoten, wenn kineen in de Küerke was, dat was „Geld ut't Fenster schmieten!", dat was`ne Daudsünde. Eene Butenlampe vüör off ächter't Hus was eenen unwiesen Luxus.

Et mock auk nicks, wenn man lück in Düstern tosammen satt. Wat man beküern woll, brukede man ja nich to seihn.

Man gönk auk gääne met de Höhner in'n Bedde un stonn met de Höhner wier up.

Villicht kennt no iälke ollere Lüde dän sinnigen Sprüek: „Laot us män no Bedde gaohn, wi küent dat Lampenfett nich mähr verdeinen!" Man konn eene Arbeit wull in aller Ruhe liggen laoten. Et gönk ja nich üm Minuten un Sekunden äs vöndage.

Wat sitt dao` ne Gelaotenheit in dän Sprüek: „Kaas wull bidage dohn!"

Et konn aober auk wull aohms - half in Spaß off halv in'n Ernst - heiden: „Et is'n hell Maonlecht, kaas wull buten arbeiden!"

De Lüde wussen no nicks vön Öko- un Atomstrom, wenn se eenen Menschken, de in Düstern wat dohn moß un daorüm düftig an't Knüettern was, iärgern wollen. Et hädde dann so, (weil Katten augen in Düstern lochtet]: „Kaas di wull`ne Katte vüör de Knei binnen!" •

Willi Kamp

im März 2008